DIRECTOR:
Enrico S. Quizon
LEAD CAST: Dennis Trillo, Kim Chiu, JC de Vera, Eric Quizon
STORY and SCREENWRITER: Gina Marisa Tagasa
PRODUCER: Lily Monteverde
CINEMATOGRAPHY: Mo Zee
MUSIC: Miguel Mendoza
EDITING: Chrisel Galeno-Desuasido
GENRE: Drama, Romance
DISTRIBUTOR: Regal Films
LOCATION: Manila
RUNNING TIME: 115 minutes
Technical assessment:
3
Moral assessment: 2.5
CINEMA rating: A14
MTRCB rating: PG13
Bibigyan ni Zyra Paez (Kim Chiu) ng
pagkakataon ang sarili na tanggapin muli ang dating kasintahan na si Carl
Mauricio (J.C. De Vera). Aakalain ni Zyra na malulubos ang kaligayahan sa pasya
niyang ito subalit masusumpungang puno siya ng pag-aalinlangan sa kanyang mga
desisyon. Sa gitna ng pagkagulumihanan ay magiging confidante ni Zyra ang
matalik na kaibigang doktor na si Ian Arcano (Dennis Trillo). Kay Ian siya
magsasabi ng kanyang mga alinlangan at damdamin. Samantala higit pa sa
pagkakaibigan ang nararamdaman ni Ian para kay Zyra.
Bagamat simple ay kapani-paniwala ang daloy ng kwento
ng One Great Love na
nakasentro sa karakter ni Zyra. Maayos itong nagampanan ni Chiu dahil may mga
kinilig, natuwa, naawa at nainis sa karakter nya. Subalit ang lalong epektibo sa
naging pagganap ay si Trillo; sadyang nararapat siyang tanghaling Best Actor sa MFF 2018 dahil sa kanyang pagganap dito. Mahusay niyang naihatid ang karakter ni Ian
bilang nabigong asawa, maunawaing kaibigan, at mapagparayang nagmamahal. Magaling
ang pagkakadirehe ni Quizon at mainam na naipabatid ang mensahe ng pelikula sa
kabila ng kapayakan ng kuwento. Nakapaghatid din ilang makabuluhang
linya na posibleng tumatak sa mga manonood bilang mga hugot tungkol sa kahulugan
ng “one great love”. Tama lamang ang mga kuha ng kamera at nakakagiliw panoorin
ang ilang detalye ng food and organic
gardening business nina Zyra. Samantala walang ng lumutang na iba pang
aspetong teknikal ng pelikula.
Ano nga ba talaga ang tanging dakilang pag-ibig o one
great love, at meron ba talaga nito? Sinagot naman ito ng pelikula sa
pamamagitan ng karakter na buong husay na ginampanan ni Trillo. Ang Dakilang Pag-ibig ay tunay na
pagmamahal dahil nagpaparaya, nagpapaubaya, nagsasakripisyo, umaako sa lahat ng
kasalanan, nananatiling tapat, nagpapalaya, nagpapatawad at patuloy na
tumatanggap sa minamahal. Pinakita din ng pelikula ang dakilang
pagmamahalan sa pamilya kung saan may pagmamalasakit, pagpapatawad, pagtanggap,
pagtutulungan, kahandaang magsakripisyo at paglalaan ng panahon kung
kinakailangan. Ito ay sa pagitan ng magulang at anak, stepmother at
stepchildren, sa magkapatid, at kahit sa magkaibigan. Ang pagkakaroon ng
matapat at mabuting kaibigan katulad ng pamilya ay kaloob ng Diyos na maaring
gawing sandigan sa panahon ng pagkalito at pasakit. Ang isang tunay na kaibigan
ay naglalaan ng oras para makinig nang walang paghuhusga sa halip ay hahangarin
ang kabutihan para sa kaibigan. Sa kabuuan ay simple man ang kwento ng One Great Love ay may malalim
itong mensahe tungkol sa pagmamahal at
pakikipagrelasyon. Gayunpaman, tumalakay din ito ng mga nakababahalang
tema katulad ng casual pre-marital sex sa mga kabataan at ng
pangangalunya ng taong may-asawa.
Samakatwiran mas akma ang panoorin ito sa mga taong may hinog na
kaisipan. Mapanganib panoorin ito ng mga
kabataan nang walang gumagabay, pagkat maaaring tularan nila ang asawang
nagtaksil sa paniniwalang patatawarin naman sila ng kanilang asawa. —IBD
