Never not love you

DIRECTOR: Antoinette Jadaone  STARRING: James Reid, Nadine Lustre; WRITTEN BY: Antoinette Jadaone; GENRES: Drama, Romance; CINEMATOGRAPHY: Mycko David; PRODUCTION COMPANY: Viva Films; DISTRIBUTED BY: Viva Films; COUNTRY: Philippines; LANGUAGE: Filipino, English  RUNNING TIME: 1 hour 40 minutes

Technical assessment: 3

Moral assessment: 2.5

CINEMA rating: V18

MTRCB rating: PG

Nang dahil sa trabaho, magtatagpo ang landas nila Gio (James Reid), isang graphic artist at Joanne (Nadine Lustre), isang bagong graduate at bagong salta sa Maynila na nagta-trabaho sa isang advertising agency. Magkaka-gusto agad si Gio kay Joanne kaya’t liligawan niya ito sa paraang alam niya—magkakamabutihan sila sa kabila ng pagiging magka-iba ng pananaw sa buhay. Makukumbinsi ni Gio si Joanne na magsama silang dalawa at dito’y lalo silang tila hindi na mapaghiwalay. Ngunit masusubok ito nang magkaron si Gio ng oportunidad sa London at mapilitan si Joanne na sumama dito kahit pa nasa Maynila ang katuparan ng kanyang pangarap. Magsasama sila sa London at doon magsisimula nilang madiskubre ang kani-kanilang sarili – ang kani-kaniyang kasiyahan na kahit pa ibig sabihin nito’y kailangan nilang magkahiwalay.

Marubdob ang bawat damdamin sa Never Not Love You. Taong-tao ang mga karakter na binigyang buhay ng isa sa mga pinakamainit na tambalan ngayon. Lumabas ang pelikula sa karaniwang de-kahong romansa. Nariyan pa rin ang kilig, pero sa pagkakataong ito, mas may malalim na kabuluhan at sinseridad ang pelikula na talakayin ang isang relasyon sa gitna ng mga pansariling ambisyon, kasiyahan at pangarap. Mga bagay na nangagailangan ng mas mataas na antas ng pagdedesisyon. Ang mga komplikadong sitwasyon at karakter ay nagampanan ng buong husay ng dalawang bida. Bumagay sa kanilang parehas ang kanilang mga papel—si Reid bilang happy-go-lucky artist at si Lustre bilang ma-ambisyon na probinsiyana.  Sakto ang timpla at hagod ng damdamin ng mga eksena, pati na ang mga malalim na katahimikan sa gitna ng mga away, pagtatalo, at kaguluhan. Pati ang mga piniling lugar ay nakatulong din ng husto sa lalo pang ikinaganda ng kuwento.  Kita ang kaluluwa ng pelikula na naka-ugat sa dalawang pusong nagmamahalan-magkaiba ng mundo ngunit pinagtagpo ng layuning mahalin ang isa’t-isa.  Lamang, tila nagkulang ang pagkahubog ng kabuuan sa bandang huli kung saan hindi masyadong buo ang naging katapusan ng kwento. Hindi lamang bitin kundi nagging salat sa sapat na katuwiran ang naging pagtatapos. Pawang hindi rin gaanong nahalukay ang lalim ng mga damdamin. Maaring sinasadya din nitong iwasan ang histerya, ngunit may nawala ding elemento sa pelikula na dapat sanaý nakapukaw ng isipan at puso ng manonood.

Nasa sentro ng Never Not Love You ang dalawang kabataang nagsisimulang mamulat sa katotohan ng pagsasama ng magkasintahan. Bagama’t hindi tahasan, nakakiling ang pelikula sa makabagong pananaw patungkol sa pakikipag-live-in: walang alinlangang pinalalabas ito na katanggap-tanggap sa lipunan. Nakababahala na hindi man lang nababahala ang kahit na sino sa kuwento sa ganitong klaseng set-up na mayroon ang dalawa. Tila baga, sapat nang panghawakan ang mga salita—o ang pagpapa-tattoo para masabing may matibay na saligan na ang pagsasama ng isang babae at isang lalaki. Mamumuhay na parang mag-asawa na kinasal lamang sa isang tattoo bar.

Wala ring maituturing na kinikilalang gabay ang mga tauhan. Ang mga desisyon ay pawang naka-base lamang sa payo ng kaibigan o di kaya ng boss. Napakaliit ng papel na ginampanan ng mga magulang sa pelikula. Parte marahil ng nais panghawakan ng pelikula na nasa wastong gulang na ang mga karakter upang gumawa ng kani-kanilang pansariling desisyon.  Delikado ito at nakababahala lalo’t higit sa mga pagkakataong nangingibabaw ang emosyon sa isipan. Walang malinaw na pagpapahalaga ang mga tauhan bukod sa pagnanais nilang maging “masaya”—pero maging ang kasiyahang ito ay dapat pag-isipan kung saan naka-ugat at kung saan patungo. Parte marahil ng napakaraming tanong sa isipan ng mga tauhan sa bandang huli. Saan ba dadalhin ng tadhana ang dalawang magka-ibang puso na bumabagtas ng kani-kaniyang kapalaran? Anong bukas ang naghihintay kung laging magtatalo ang puso at isipan? Sa gitna ng mga pagtatalong ito, sana’y naisipan ng pelikula na kurutin kahit gaano kanipis ang posibilidad na baka kaya magulo ang mga relasyon ay sa dahilang wala itong tamang pagbabasbas? Wala itong matibay na ugat at maasahang gabay at saligan—na ang dalawang puso ay di maaring isipin lamang ang kanilang pansariling kapakanan kundi pati ang kapakanan ng buong komunidad sa kanilang paligid sampu ng bubuin nilang maliit na lipunan sa kanilang tahanan? Tila yata ang konsepto ng kasiyahan sa kasalukuyang panahon ay naka-sentro sa pansariling kaligayan, ambisyon at mararamot na dahilang dikta ng lipunang nalunod na sa kamunduhan. Dahil sa mga maseselang tema ng pelikula ukol sa relasyon, minamarapat ng CINEMA ang Never Not Love You ay akma sa mga manonood na 18-taong-gulang pataas.