Cast: Eddie Garcia, Rez Cortez, Armida
Siguion-Reyna, Gardo Verzosa, Luz Valdez, Soxy Topacio; Director: Jun Robles
Lana Screenplay: Jun Robles
Lana; Producer: Antonio Tuviera; Running Time: 110 minutes; Genre:
Drama; Location: Philippines
Technical Assessment: 3.5
Moral Assessment: 2.5
CINEMA Rating: for viewers 14 and
above
Si Rene (Eddie Garcia)
ay 70-taong-gulang na nang matanggap sa sarili ang pagiging bakla. Ngayon, siya’y nabubuhay nang mag-isa
matapos pumanaw ang kanyang ina. Sa
kanyang palagay ay wala na siyang dahilan upang maging masaya sa buhay sapagkat buong buhay niya, siya ay
nagbalat-kayo at huli na ang lahat para sa kanya. Dahil dito’y pinaghahandaan na lang niya ang kanyang kamatayan.
Naka-kahon na ang lahat ng gamit
sa kanyang bahay at may listahan na rin siya ng kanyang mga huling habilin. Maging ang kanyang kabaong na nabili
niya noong ito’y naka-sale ay
ipinauwi na rin sa kanyang bahay sapagkat magsasara na ang binilhan niyang
punenarya. Ang tanging kasama na
lamang ni Rene sa buhay ay ang napulot na asong pinangalanan niyang Bwakaw. Bagama’t sa simula’y di alam ni Rene
kung paano ito mamahalin, kalauna’y ito na ang kanyang magiging matalik na
kaibigan. Magsisimulang magbago ang pagtingin ni Rene sa buhay
nang magkasakit si Bwakaw ng cancer. Kasabay nito’y makakatagpo siya ng
bagong pag-ibig sa katauhan ng tricycle
driver na si Sol (Rez Cortez). Sa unang pagkakataon, haharapin ni Rene ang buhay sa halip na
kamatayan. Ngunit ito kaya’y
magtatagal?
Isang nakakaaliw na
panoorin ang pelikulang Bwakaw. Swabe ang hagod ng mga eksena at malinaw
ang daloy nito na sumasalamin sa uri ng pamumuhay sa mga karatig-nayon sa
Pilipinas. Naipakita ng pelikula
ang bibihirang tapat na pagsasalarawan ng pamumuhay ng isang komunidad sa
bandang lalawigan. Payak at ang tanging
yaman lamang ng mga tao ay ang makabuluhang relasyon at pagkakaibigan. Ngunit ang tunay na hiyas ng pelikula ay
ang mga nagsigananap dito na pinangungunahan ng batikang si Eddie Garcia na
nagwagi bilang pinakamahusay na aktor para sa pelikulang ito sa ginanap na Cinemalaya. Bagama’t wala nang kailangan pang patunayan ang isang Eddie
Garcia, nagawa niyang buhayin ang katauhan ni Rene nang hindi kinakailangang
maging stereotyped. Kakaibang lalim at natural na atake ang
pinairal ni Garcia dito at nararapat lamang ang tinanggap niyang pagkilala.
Ang Bwakaw ay tumatalakay sa isang buhay na puno ng maraming pagsisisi.
Pagsisisi sa inaakalang
pagbabalatkayo at pagkakakulong sa isang pagkataong taliwas sa tunay na
kagustuhan. Resulta’y isang buhay
na nababalot ng matinding kalungkutan. Sinasalamin ng pelikula ang karamihan sa kinatatakutan ng mga
tao—ang tumanda at tumandang nag-iisa. Kapag pinagsama ang dalawang ito, tiyak na magiging miserable
ang buhay ng isang tao hanggang kamatayan. Hindi rin naman ito nangangahulugang tama at totoo. Nang makatagpo si Rene ng pagmamahal ay
nagbago naman ang kanyang pananaw, ‘yun nga lang, ipinakita pa ring nakasalalay
sa ibang tao ang kanyang kaligayahan. Ang pagiging miserable ni Rene ay nag-uugat sa kanyang maling
pagtingin sa sarili, sa mundo, sa buhay at sa simbahan. Kung tutuusin ay walang dahilan si Rene
na magalit sapagkat naging mabuti naman ang buhay para sa kanya.
Nakababahalang pawang
ang simbahan at ang mga turo nito ukol sa homosekswalidad ang itiniturong ugat
ng pagiging miserable ni Rene. Hindi
nagbago ang kanyang pagtingin ukol dito hanggang sa huli bagama’t bukas ang simbahan
na siya ay tanggapin. Marahil ay pinatigas
at minanhid na siya ng panahon at talagang nagsara na ang kanyang puso’t isip
sa paniniwalang hindi siya pinaboran ng Diyos kahit kailan. Kita naman sa pelikula na patuloy pa rin
si Rene sa paghahanap ng tunay na kaligayahan at paunti-unti naman ay natutunan
na niyang muling manalangin. Maaring
matagal pa, malayo at di-tiyak ang landas na tatahakin ni Rene, ngunit ang
mahalaga’y nanatiling may pag-asa. Kasama na diyan marahil ang pag-asang matagpuan niya ang
tunay na kapayapaan at kasiyahan sa pagtanggap niya sa pagmamahal ng Diyos na
nakahandang tumanggap sa kanya maging ano at sino pa man siya. Sa bandang huli’y maaari ding isipin na
hindi kaya naging “bwakaw” lamang si Rene sa pagmamahal sa kanyang sarili kung
kaya’t di na niya nakita ang lahat ng pagmamahal na nakapaligid sa kanya?
