Saturday, May 19, 2018

Single/Single Love is not Enough

DIRECTOR: Veronica Velasco, Pablo Biglang-awa  CAST:  Shaina Magdayao, MAtteo Guidecelli, Anna Luna, Will Devaugh JC Santos, Bryan Sy  WRITERS: Lilit Reyes, Jinky Laurel  PRODUCER:  Martin Mayuga  EXECUTIVE PRODUCER: Ronald Arguelles  EDITOR: Henry Ramirez  DIRECTOR OF PHOTOGRAPHY: Elyza Esquivel  PRODUCTION COMPANY: Star Cinema, Cinema One, Philippine Star  DISTRIBUTOR: Star Cinema  LOCATION: Philippines  GENRE:  Romance Comedy  RUNNING TIME: 113 minutes 
Technical assessment:  3.5
Moral assessment: 3
 CINEMA rating: V16
MTRCB rating: R13
Magkakatagpo at mabilis na magkakaibigan sina Joee girl (Shaina Magdayao) at Joey boy (Matteo Guidecelli) sa panahong ipinagbubuntis ni Joee ang bunga ng relasyon sa dating kasintahan na si Steve (JC Santos). Tatayong foster father ng sanggol si Joey at magiging masaya sa umpisa. Samantala hindi matatag ang kita ni Joey sa pagiging myembro ng banda, kumpara kay Joee na may stable job. Sa kalaunan ay magpapatong-patong ang mga bayarin sa konsumo nilang tatlo. Mauuwi sa umiigting na pagtatalo ang problemang pinansyal at aabot sa punto na kailangan nilang magdesisyon kung kaya nilang magpatuloy sa gayung sitwasyon o hindi. 
Mula sa sinusubaybayang romcom sa telebisyon ay hinatid ng produksyon sa sinehan ang Single/Single Love is not Enough.  Maayos ang pagkakalahad ng kwento ng pelikula. Maliwanag ang paghahatid ng mensahe.  Nagsimula sa masaya at buong pagmamahalang pagsasama, naharap sa mga tipikal na hamon ng relasyon, nagkaroon ng di  mapapasubaliang realisasyon at humantong sa mga mahalagang desisyon. Kakaiba ang ideya ng foster father.  Mahusay ang binigay na trato ng direktor sa mga eksenang naglalarawan sa mga pangunahing tauhan bilang musician at corporate employee, gayundin ang pagpapakita ng suporta ng ibang karakter tulad ng lolo at mga kaibigan. Nakadagdag sa paghahatid ng aliw ang mga eksenang nagtatampok sa mga ito. Magaling ang mga pagganap nina Magdayao at Guidecelli lalo na ng beteranong aktor na si Davao. Lumutang naman si Bryan Sy sa kanyang pagganap bilang binabae. Maganda ang disenyo ng produksyon at akma lamang ang mga costume at make-up sa hinihingi ng istorya. Malinis at halos hindi napansin ang mga inilapat na musika, ilaw at tunog. Nakatulong ang kapayakang ito upang hindi makagulo sa seryosong mensahe ng pelikula.
Katulad ng haligi sa isang bahay na kailangan ng suporta upang tumayo at maging matatag, pundasyon din ng isang relasyon ang tapat na pagmamahalan na pinapatatag ng pagsisikap at suporta ng bawat isa. Ito ay subok na pormula ng matagumpay na pagsasama lalo na sa mag-asawa o sa pamilya. Samakatwid hindi sapat na nagmamahalan lamang sa magkarelasyon; mahalaga rin na mulat sa katototohan na may mga pangangailangan na dapat matugunan katulad ng mga bayarin sa mga konsumo sa pang-araw-araw na buhay. Responsiblidad ng bawat isa na makibahagi sa realidad na ito.   Nagsisilbing paalala ang mensaheng ito ng Single/Single Love is not Enough  sa mga nais pumasok sa isang relasyon. Magandang materyal ang pelikula sa mga diskusyon ng pakikipagrelasyon hindi lang sa mga kabataan kundi kahit sa mga may sapat na gulang katulad ng mga karakter nina Joee at Joey sa pelikula. Ipinakita sa pelikula kung ano ang maaring kahinatnan o epekto ng mga ginagawang desisyon sa buhay. Binigyan-daan ang pagpapatawad, suporta ng pagkakaibigan, foster fatherhood, pagpapahalaga sa banal na Sakramento, tapang sa pagharap sa katotohanan, at matatag na desisyon.   Samantala sa kabila ng makabuluhang mensahe ng Single/Single Love is Not Enough ay maselan ang mga isyung tinalakay katulad ng  broken family, pre-marital sex, unwanted pregnancy, living-in at non-intention to marry. Akma ang panooring ito sa mga taong may hinog na kaisipan.  (IBD)