Wednesday, May 23, 2018

Kasal

DIRECTOR:  Ruel S. Bayani  LEAD CAST:  Bea Alonzo, Paulo Avelino, Derek Ramsay, Christopher de Leon, Cherie Gil, Ricky Davao, Ces Quesada and Celeste Lagaspi  SCREENPLAY: Patrick Valencia  GENRES: Drama, Romance PRODUCTION COMPANY: ABS-CBN Films, Star Cinema  DISTRIBUTED BY: Star Cinema  COUNTRY:    Philippines  LANGUAGE: Filipino, English  RUNNING TIME: 1 hour 53 minutes
Technical assessment:  4
Moral assessment:  2.5
CINEMA rating: V16
Nakatakdang ikasal si Lia Marquez (Bea Alonso), isang public school teacher, kay Philip Cordero (Paulo Avelino) na kumakandidato bilang alkalde ng Cebu.  Tinututulan ng mga magulang ni Philip (Christopher de Leon at Cherie Gil) ang pagpili ng binata kay Lia, pero ipaglalaban ni Philip ang pagmamahal niya rito.  Sa kasagsagan ng pangangampanya ni Philip at Lia, papasok si Wado, dating kasintahan ni Lia, at sa kagustuhan nitong makipagbalikan sa dalaga ay sasakyan ang kanyang pagiging isang engineer upang mapasama sa isang malaking proyektong makakatulong sa kampanya ni Philip.  Matigas na tatanggihan ni LIa ang panunuyo ni Wado na sobrang bilib sa sarili, pero dadating ang puntong magdududa na rin si LIa kay Philip gawa ng isang lihim na mabubunyag ni Wado tungkol sa nakaraan.
Maituturing na ring “engaging” ang kuwento sa dramang Kasal, dahil gawa ng marubdob na pagganap ng mga pangunahing artistia ay nakuha nito ang interes na manunuod.  Maaaring hindi nalalayo sa katotohanan o realidad ang mga pangyayaring nasasaad sa Kasal, kaya lang, dahil sa ito ay isang pelikulang tumatakbo lamang sa loob ng dalawang oras, “mapupuruhan” kayo ng mga eksenang emosyonal na bagama’t kapani-paniwala ay bahagyang nagiging artipisyal sa dami.  Natatangi ang husay ng cinematography, at katambal ng akmang tugtugin at masusing editing, ay nakukuha nito ang tamang damdamin hinihingi ng eksena sa manunuod, habang nailalabas naman nito ang ganda ng pinapanood—tao man, pangyayari, o lugar.  Hindi matatawaran ang galing ni Alonzo sa pag-emote, ngunit di naming mapigil na magtaka kung sinadya bang gawin siyang payat at payak ang hitsura para sa papel ng isang public school teacher.
Idinidiin ng Kasal ang kahalagahan ng pagiging tapat—sa sarili, sa Diyos at sa kapwa—tungo sa kapanatagan ng kalooban.  Maliwanag nitong naipakita na nagiging ugat ng kaguluhan ang hindi pagiging tapat, at ang kasamaan ay hindi ginagantimpalaan.  Sa kabuuan ng Kasal, minabuti ng CINEMA na bigyan ito ng V16 rating—dapat maging edad 16-pataas lamang ang maaring manood nito—dahil kahit na makatuwiran naman ang naging wakas nito at “malinis” ang pagkakagawa ng mga maseselang eksena, pinapaalala lamang namin sa madla na salungat pa rin sa turo ng Inang Simbahan ang pagsisiping sa labas ng kasal, at hindi dapat tanggapin bilang isang “ordinaryong bagay” na lamang sa buhay lalo na ng mga kabataan.  (TRT)