DIRECTOR: Joyce Bernal LEAD CAST: Vilma Santos Recto, Angel Locsin & Xian Lim PRODUCER: Charo Santos-Concio
GENRE: Drama DISTRIBUTOR:
Star Cinema LOCATION: Philippines RUNNING TIME: 2 hours
Technical assessment: 3
Moral assessment: 3
CINEMA rating: V14
Si Vivian (Vilma
Santos) ay kilala sa pagiging matapang, mapangahas, at matagumpay na babae sa
kanyang larangan. Tinitingala siya, kinatatakutan at nasa pinakamataas na
posisyon sa kanyang kumpanya. Ngunit magbabago ang lahat nang siya ay ma-diagnose ng cancer sa buto. Dito kinakailangan niyang sundin ang magiging payo
ng kanyang doctor, kabilang na ang pag-aalaga ng isang private nurse. Papayag si Vivian sa kundisyon na itatago pa rin ang
kanyang sakit at walang ibang kahit sino ang dapat makaalam. Darating sa buhay
ni Vivian si Jaica (Angel Locsin) na sa simula ay mahihirapang makisama sa
kanya ngunit dahil kailangan nito ng trabaho para sa kanyang pamilya, pagti-tiyagaan
niya si Vivian. Sa tulong ng isang
kaibigang nagmamalasakit kay Vivian, matatawagan ni Jaica ang nag-iisang
anak ni Vivian, si Albert (Xian Lim) na naninirahan sa Amerika. Makukumbinsi ni
Jaica si Albert na umuwi ng Pilipinas dahil isisiwalat nitong may cancer si Vivian—isang paglabag sa
mahigpit na bilin ni Vivian. Sa pag-uwi ni Albert matutuklasan ni Jaica ang
malalim na sugat sa relasyon ng mag-ina.
Isang magandang
karanasan ang makitang muli sa big screen
si Bb. Vilma Santos. Binigyang-buhay niya ang karakter ni Vivian nang buong
husay. Kapwa mahuhusay din sina Angel Locsin at Xian Lim. Hindi naman gaanong
bago ang tema ng pelikula kung tutuusin, ngunit sadyang dinala ni Ate Vi ang
kabuuan ng pelikula. Dama ang puso ng kuwento sa husay ng kanyang pagkakaganap.
Mahusay din ang script at direksiyon
na hindi masyadong nagpadala sa tukso na iliko ang kwento sa sentro. Marahil ay
nagkulang lang ang Everything About Her
nang bahagya sa pagpapaigting pa ng kwento ng mag-inang Vivian at Albert.
Parang marami pang dapat sana’y ipinakita upang higit pang naramdaman at
naintindihan ng manonood ang kanilang pinanggagalingan. Marahil hindi na rin
dapat pang binigyang-diin ang kuwento ni Jaica na pawang nakagugulo lang sa
daloy ng kuwento ni Vivian. Sa kabuuan naman ay hindi na rin masama ang
kinalabasan ng pelikula na patungkol sa mga ina na piniling magkaroon ng
sariling karera bukod sa pagiging ina.
Malakas ang mensahe ng
Everything About Her patungkol sa
mga tinatawag na working moms. Ipinakita
ng pelikula kung gaano kalalim ang sugat na ibinabaon nito sa puso ng mga anak
na tila naghahanap ng pagkalinga at panahon ng isang ina. Hindi nito
hinuhusgahan o nilalahat ngunit ipinakita nito ang karaniwang nagiging kapalit
ng pagtatrabaho ng ina sa labas ng tahanan—ang pagkakaroon ng galit ng mga anaksa
kakulangan ng pagkalinga ng isang ina. Sa isang banda, may batayan nga ba ang
pagiging isang mabuting ina? Sa lipunang pinaiikot ng materyalismo, saan nga ba
lulugar ang isang ina kapag nagugutom na ang kaniyang mga anak? Parating
nagiging batayan ng pagiging isang mabuting babae ang pagiging mabuting ina.
Kapag sa paningin ng mga anak ang ina ay naging masama, parang nagiging
masamang babae na rin siya. Tila ba naka-angkla ang basehan ng pagkababae sa
pananaw ng iba—sa kanyang anak o asawa—ngunit hindi sa sarili niyang
pagsusumikap at ambag sa lipunan. Ito isang malaking debate magpasa-hanggang
ngayon. Ngunit marahil sa kabuuan ng Everything
About Her, ang naipahiwatig nito ay—para sa isang masaya, makabuluhan, at
mahabang buhay, nararapat na bigyang pansin at oras ang mga tunay na mahalaga
sa buhay, ang mga relasyon, relasyon sa Diyos, sa sarili, sa pamilya, sa
kaibigan at sa mas malawak pang komunidad. Sa bandang dulo ng buhay ng isang
tao, hindi yaman, kasikatan o kapangyarihan ang magiging sukatan ng
makabuluhang buhay kundi ang malalalim na relasyon na itinanim at pinagyabong
nang may wagas na pagmamahal.
