DIRECTOR: Chito Rono LEAD CAST: John Lloyd Cruz, Richard Gomez, Jessy Mendiola, Gretchen Barretto, Enique Gil, Sylvia Sanches, Vincent de Jesus PRODUCER & DISTRIBUTOR: Star Cinema GENRE: Family drama LOCATION: Philippines RUNNING TIME: 132 minutes
Technical assessment:
3 Moral Assessment: 3 MTRCB rating: R13 CINEMA rating: V14
Guwapo
at mabait pero “mentally challenged” si Ronald, (John Lloyd Cruz), naglilingkod
bilang hardinero sa isang paaralan upang makapagtapos siya ng elementarya. Nagsisilbing “tutor” niya ang gurong si
Bessy (Jessy Mendiola) na itinuturing naman siyang kaibigan. Ngunit “in love” si Ronald kay Bessy,
at sa kanyang payak na pang-unawa, mahal din siya ni Bessy. May kakalat na video ng dalawa na mukhang ginagahasa ni Ronald si Bessy. Madedemanda si Ronald ng “rape”, at
magsisimula ang masalimuot na takbo ng tahimik nilang buhay.
Maganda
at nakaduduro ng isipan ang kuwentong hinangad na isalaysay ng The Trial, at hindi rin karaniwan ang
ganitong tema sa industriya ng pelikulang Pilipino, bagay na nagsilbing hamon
sa mga nagsiganap. Bagama’t pasado
naman ang pagganap ng karamihan sa mga tauhan, minsan ay “magaralgal” ang atake
nila Gomez at Lloyd Cruz sa kani-kaniyang mga papel—nasasapawan ng kanilang
imahen bilang mga artista ang katauhang kanilang kinakatawan sa pelikula. Yon bang, hindi ka nila “madala” sa
pag-arte nila, naroon pa rin sa likuran ng isip mo na “Sine lang yan, yan si
John Lloyd, iyan si Richard.”
Hindi rin makinis ang pagkakatagni-tagni ng mga pangyayari, para tuloy
“inimbento” lang ang storya para makagawa lang ng pelikula. Kulang sa realismo ang characterization, at maraming “daplis” o
“inconsistency” ang katauhan ni Ronald, pero maayos ang pagkakaguhit ng
ginampanan ni Mendiola.
Maganda
ang hangarin ng The Trial na
ipagtanggol ang mga “kapos” sa kakayahan ng isip, at batikusin ang mga huwad na
pagmamamabuti ng ilang mga nakaaangat sa buhay. Sana’y pinalalim pa nito ang mensaheng iyon, pero hindi ito
nangyari. May isang malaki at
maling hakbanging ginawa ang The Trial
na nakabawas sa kabubuan ng magandang hangarin at mga katangian nito. Iyon ay ang pagtuon ng labis na pansin
sa relasyon ng mag-asawang Gomez at Baretto bilang Atty. Julian at Amanda Bien
na tumutulong sa kaso ni Ronald.
Talos naming dapat sabikin ang manonood sa katotohanang huhubaran sa
dulo ng pelikula, pero nakaka-labnaw sa halaga ng pangunahing mensahe ng The Trial sub-plot ng mag-asawang magusot ang buhay. Oo nga’t mabuti ang ipinakitang
pagpapatawad at pagkakasundo ng mag-asawa pero minadali ito, kulang sa lalim—bagay
na naging sanhi ng pagsasanga ng layunin ng pelikula. Pag may nagtanong sa iyo tuloy kung tungkol ba sa ano yung The Trial, malamang hindi mo masasabi
kung ito ba’y tungkol sa paglilitis na mag-aangat sa ating kamalayan hinggil sa
taong tulad ni Ronald, o tungkol sa happy
ending na dinala ng paglilitis?
Kayo ang humusga.
