Sunday, September 7, 2014

Barber's Tales

DIRECTOR: Jun Robles Lana  LEAD CAST: Eugene Domingo, Eddie Garcia, Shamaine Buencamino, Gladys Reyes, Noni Buencamino, Iza Calzado, Daniel Fernando, Nicco Manalo, Sue Prado MUSIC:  Ryan Cayabyab  CINEMATOGRAPHY:  Carlo Mendoza  GENRE:  Drama
Technical assessment:  4  Moral assessment: 2.5  CINEMA rating: V 18
        Si Marilou (Eugene Domingo) ay ang masunuring maybahay ni Jose (Daniel Fernando), and kaisa-isang barbero sa baryo nila sa probinsiya.  Hindi lamang siya masunurin—sunud-sunuran pa siya, hanggang sa puntong siya pa ang nagpapaligo sa asawa niya, na iniiwan lang naman siya sa gabi para mag-gudtaym sa kabayanan.  Pero may pakinabang din ang pagiging masunurin niya, pagka’t natuto siyang maggupit ng buhok sa kauudyok ng asawa, kahit na nga wala naman siyang ambisyong magbarbero, at katunayan siya ang gumugupit ng buhok ni Jose.  Isang araw, hindi na gigising si Jose matapos ang isang gabi ng pagkalasing.  Bagama’t bantulot, masusumpungan ni Marilou na buksang muli ang barberya ni Jose, at siya nga ang magiging barbero dito.  Mapapasok sa masalimuot na mga pangyayari ang buhay ni Marilou, at mangyayari ang hindi inaasahan.
        Kahanga-hanga ang pagkakabuo ng Barber’s Tales (Mga Kuwentong Barbero), at karapat-dapat lamang na isang batikang artistang tulad ni Domingo ang maging tampok na tauhan nito.  Walang maipipintas na gasino sa aspetong teknikal ng pelikula sapagkat ang mga mumunting pagkukulang nito ay nalulukuban naman ng pangkalahatang angking kinang nito, lalo na ng sinematograpiya.  Maganda naman ang kuwento bagama’t minsan ay mukhang pilit, tila ba labis na mainit sa paghahatid ng pinili nitong mensahe.  Mahusay ang direksiyon, kapani-paniwala ang setting ng istorya, at malikhain ang sinematograpiya.  Ipinanalo ni Domingo ang pagganap niya sa Barber’s Tales ng isang Best Actress award sa 2013 Tokyo International Film Festival—salamat naman at kinikilala ang husay ng aktres hindi lamang sa komedya kundi pati na rin sa drama.
       Tanong ng manonood, “masustansiya” ba ang Barber’s Tales?  Naniniwala kaming may matayog na hangarin ang pelikula.  Gusto nitong imulat ang mga mata ng manonood sa abang kalagayan ng mga kababaihan sa isang kulturang hindi kumikilala sa kanilang mga katangian liban sa kanilang pagiging butihin asawa, ina, o alila.  Nais din ng pelikula na bigyang-diin ang kawalan ng katarungan sa isang lipunang mapang-api sa maralita at mapagsamantala sa mangmang.  Kaya lamang, hindi nito napalalim ang pagsasaad ng matayog nitong hangarin, nagmukha tuloy karikatura ang ilang mga situwasyon.  Isang halimbawa, hindi naipakita nang sapat ang mga dahilan kung bakit nagiging rebelde ang isang tao.  Gasgas na gasgas na rin ang tema ng martial law at diktadurang Marcos—wala na bang ibang maaaring sisihin ang mga gustong magrebelde?  Sa kabila din ng pagsisikap ng pelikula na ipakitang may magagawang kabutihan ang mga babae kung magkakabuklod-buklod lamang sila, nanaig pa rin ang nakakalungkot na katotohanang ang kanilang pagkamasarili at karuwagan din ang daan tungo sa kanilang pagkabigo.  Sa gawing pagtatapos “sumemplang” ang Barber’s Tales: napaniwala nito ang manonood na moog ng lakas at liwanag ng isip si Marilou, pero paano siya “bumigay” nang walang kaabug-abog?  Iisa lamang ang maaaring dahilan noon—“classmates” pala sila ng luka-lukang akala niya’y tinutulungan niya.  Hay, kuwentong barbero nga.