Cast: Lovi Poe, Jennilyn Mercado, Paulo Avelino Director: Joel Lamangan Genre: Sex, Drama-Comedy Location: Philippines
Technical
Assessment: 3
Moral
Assessment: 2
CINEMA
Rating: V18
MTRCB
Rating: R-13
Umatras sa bonggang kasalan ang ‘bride’ na
si Vivian (Lovi Poe) kasabay ng pagbubunyag niya ng iskandalo na kinasangkutan
ng “groom” na si Philip (Paulo Avelino) at matalik na kaibigan na si Sheila
(Jennilyn). Sa gitna ng sakit at kahihiyan ay hiwa-hiwalay na magbabyahe ang
tatlo upang pansamantalang takasan ang sitwasyon at iiwanan sa kanilang pamilya
at mga kaibigan ang pagharap sa publiko. Sa kanilang pagbabalik ay sisikapin
nila na magpatuloy sa kani-kaniyang buhay ang tatlo. Maantala naman ng konti
ang pagpapatuloy ni Philip dahil kinailangan niyang magpagaling ng
kanyang napilay na paa. Magpiprisinta si Sheila na alagaan si Philip at upang
mabigyan na rin ng pagkakataon ang sarili na maipadama ng lubusan ang damdamin
niya rito. Sa panahon ng pagpapagaling ni Philip sa piling ni Sheila ay tuluyan
silang magsasama. Samantala nagulat ang lahat sa pagbabalik ni Vivian. Lubusang
magbabago ang pagkatao nito—sa pananaw at pisikal na anyo. Mula sa simple ay
magiging moderno at liberal sa pananalita at kilos na malayung-malayo sa dating
Vivian na tumalikod sa kasal. Buong tapang niyang pananagutan ang mataas na
posisyon sa kumpanya na pag-aari ng pamilya kasunod ng pagreretiro ng kanyang
ama. Kasabay ng mga pangyayaring ito sa buhay ni Vivian ay kusa siyang
makikipagbati kay Sheila sa pamamagitan ng pagtataguyod bilang sponsor sa
magazine kung saan editor-in-chief ang matalik na kaibigan. Labis itong
ikakatuwa ni Sheila sa kabila ng kundisyon ni Vivian na panatilihing lihim kay
Philip ang pagbabati nila. Sa parehong kundisyon na maglihim naman kay
Sheila ay nakipagkasundo din si Vivian kay Philip. Sa kanilang pagbabati ay
magpapahayag ng mga totoong damdamin at panghihinayang sa naputol na relasyon.
Kasabay nito ay ang pagbibigay laya sa nararamdaman na pananabik sa isa’t isa.
Hanggang saan naman kaya hahantong ang mga plano ni Vivian at ang
pakikipagsabwatan nina Sheila at Philip na maglihiman tungkol sa nagbalik na
ugnayan nila kay Vivian.
Gasgas
na kwento ng pag-aagawan sa lalaki ang pelikulang “The Bride and the Lover” na
nilagyan ng magkahalong drama at pagpapatawa. Mahusay ang pag-arte ng mga
nagsiganap lalo na si Poe at mga suportang artista. Komportable sa mga
eksena ng pagtatalik sina Poe, Mercado at Avelino. Gayundin ang nakakalibang na
palitan ng mga linya lalo na ang voice over nina Poe at Mercado habang
nagpapambuno bago matapos ang pelikula. Mainam ang ginawang motibasyon ng
director sa pagpapalabas ng emosyon na hinihingi ng eksena. Naging maingat ang
kuha ng camera sa madalas na mga maseselang eksena ng pagtatalik. Subalit
kapuna-puna na may kahabaan ang mga eksenang sex na di naman kailangan. Maganda
ang disenyo ng produksyon. Nakalilibang ang pagpapakita ng detalye ng mga okasyon
tulad ng kasalan, mga tampok na parte at pag-aayos ng marangyang bahay, at mga
tagpo sa mundo ng korporasyon. Tama lamang ang ginamit na ilaw at paglalapat ng
tunog at musika. Nakatulong ito sa mga transisyon ng seryosong drama at patawa.
Sa kabuuan ay kinakitaan ng pagsisikap ang produksyon na ayusin ang ibang teknikal
na aspeto ng pelikula.
Nakababahala
ang mga isyung moral na tinalakay sa pelikula. Ang seremonya ng kasal na
sagrado at seryosong yugto sa buhay ng isang tao ay hindi iginalang. Kaydali
itong talikuran, hilingin, iskandaluhin, muling talikuran na parang walang
leksyon na natutunan. Pinakita sa pelikula na kung paano paglaruan ang mga
damdamin. Parang mga walang isip na nakikipag-sex dahil gustong bigyang laya
ang nararamdaman may pag-ibig man o wala. Kaswal lang ang paggamit ng droga o
'ecstasy' kahit alam nila ang dulot nito sa kanila na pwede silang mawala sa
sarili. Sa kabila ng iskandalo ay parang balewala lang na magsama nang walang
kasal ang mga kasangkot at di man lang kinumusta ang taong nasaktan nila.
Pawang mga propesyonal ang mga tauhan sa kuwento pero di ginamit ang mga
isip para maging responsable sa mga kilos nila at itaas ang dignidad.
Kung yayakapin ng isang tao ang pagbabago, mainam na tungo ito sa
pagtutuwid at lalong pagbibigay dignidad sa sarili, pero sa kaso ng tauhan ni
Vivian sa pelikula ay naging matatag nga siya sa pagharap sa buhay pero naging
mapaghiganti, mapaglaro at higit sa lahat naging parang bayarang babae na
nakikipag-sex sa sinumang matipuhan niya.
Naging napakahirap ang magpatawad sa mga nagkamali at halos mabalewala
na ang paghingi ng tawad. Sa bandang huli ay mananaig ng tatag ng pagkakaibigan
subalit saglit lamang ito at tila kailangan lang tapusin ang istorya sa
ganitong tagpo. Ang mas mahabang bahagi ng pelikula ay nagpapakita ng kaswal na
pakikipagtalik, droga, paglalaro ng damdamin, paglilihim, paghihiganti gamit
ang negosyo, at may agaw-eksena pang pagnanasa ng bakla sa kapwa lalaki. May
maliit na eksena ng pagbibigay payo ng magulang pero di naman sinusunod ng mga
anak. Kung may aral man na
inihahain ang pelikula ito ay hinog na isipan lamang ang makakakita.
