Call me Mother

Technical assessment:  3.5

Moral assessment:  3

CINEMA rating:  PG13

MTRCB rating:  PG 

Ang pelikula ay tungkol kay Twinkle De Guzman (Vice Ganda), isang mapagmahal at maalagaing "lalaking ina" sa kanyang ampong anak na si Angelo (Sean de Guzman). Pinalaki ni Twinkle si Angelo na parang tunay niyang anak, hanggang sa biglang bumalik ang Bianca (Nadine Lustre), ang tunay na ina ni Angelo, na nais makipagkonek muli sa bata. Dito magsisimula ang tensyon, ang pag-aagawan sa bata, ang paglalagay ng mga kondisyon upang magkasundo. 

Simple at hindi pilit ang direksiyon ng pelikula. Nangibabaw ang natural at makatotohanang pag-arte ng mga artista na kayang magpahayag ng damdamin kahit walang maraming salita. Ang mga closeup na kuha ng kamera ay tahimik, bagay na tumutulong upang maramdaman ng manonood ang bigat ng pinagdadaanan ng mga tauhan. Hindi rin sobra ang musika—ginamit lamang ito upang patindihin ang emosyon sa tamang sandali. Maaaring mabagal para sa ilan ang takbo ng pelikula, ngunit ang bagal na ito ang nagbibigay-lalim sa kuwento.  Marahil mas magiging convincing pa ang kuwento at ang pagganap ni Ganda kung hindi na ito hinaluan ng "signature taray" ng artista, at sa halip ay isinalarawan na lamang ng aktor ang isang seryoso at malumanay na karakter.   

Ang Call Me Mother ay isang paanyaya sa pagninilay tungkol sa habag, pananagutan, at pagmamahal na handang magsakripisyo. Ipinapaalala nito na ang pagiging ina ay hindi lamang sa dugo o są pagpapaanak, kundi sa araw-araw na pag-aaruga, presensya, at suporta sa bata, ano man ang kalagayan  sa buhay. Ipinakikita ng pelikula na ang pagiging ina—at pagiging pamilya—ay isang bokasyon: ang pagpili na magmahal, lalo na sa mga sugatan at iniwan ng mundo. Sa huli, sinasabi ng pelikula na ang tunay na paghilom ay nagsisimula kapag may isang taong handang patunayan, ang kanyang mga salitang “Nandito ako.” 

CAST AND CREW:  Director: Jun Robles Lana  Cast: Vice Ganda, Nadine Lustre, Lucas Andalio, Klarisse de Guzman, Mika Salamanca, Brent Manalo, Esnyr Ranollo River Joseph. Writers: Jun Robles Lana, Daisy G. Cayanan, Daniel S. Saniana — story and screenplay team.  Producers: Daniel S. Saniana, Marjorie B. Lachica, Vincent Del Rosario III, Veronique Del Rosario‑Corpus, Valerie S. Del Rosario. Music: Teresa Barrozo (composer) Cinematography: Carlo C. Mendoza. Editing: Benjamin Tolentino Production Companies: ABS‑CBN Studios (Star Cinema), The IdeaFirst Company, Viva Films.