Direction:
Vanessa de Leon; Cast: Yassi
Pressman, Andre Paras; Story: Based on Wattpad’s short story with
the same title; Screenplay: Jose
Javier Reyes; Editing:
Vanessa de Leon; Producers: Vincent
de Rosario III, et al; Genre: Romance;
Location: Metro Manila; Distributor: Viva Films Running
Time: 104 minutes
Technical
assessment: 2
Moral
assessment: 2.5
CINEMA
rating: V14
Si Nami (Yassi Pressman) ay isang iskolar sa Stanford,
isang kolehiyong pangmayaman. Madalas siyang makabanggaang landas si Bryle (Paras),
ang kaisa-isang apo ng may-ari ng paaralan. At sa mga pagkakataong ito ay lagi
silang magbabangayan. Nang
maglayas si Nami dahil sa problema sa bahay ay siya naman mabubundol siya ni
Bryle na namumublema sa kundisyon ng kanyang lolo na dapat siyang makapagbigay
ng apo magtutuloy sa lahi ng mga Stanford. Makikipagkasundo ang binata na
ipakikilala si Nami bilang nobya sa kanyang lolo kapalit nang pagpapatira sa condo at pera. Kaso nga lamang ay
magkakahulugan sila ng loob. Lalong magiging kumplikado ang sitwasyon sa
pagbabalik ng nobya ni Bryle na maglalagay sa damdamin ng binata sa alanganin.
Malaki ang kakulangan ng kwento ng Girlfriend for hire. Unang-una ay
gasgas na ang buod nito at kakatwa ang pinagpapalagay na magkakahulugan ng loob
ang mga tauhan sa kabila ng kanilang pagkakaiba ng motibo at prinsipyo. Lalo
nang naging kakatwa ang daloy na ang mismong suliranin sa kanilang relasyon ang
siya rin namang nagsilbing resolusyon. Walang kahirap hirap sa dalawang tauhan na panindigan o
ipaglaban ang kanilang “pag-iibigan”. Kapag dumako pa tayo sa pagganap nina Pressman at Paras ay
lalong nagiging kabugnot-bugnot ang desisyon panuorin ang pelikulang ito.
Sinasalo lamang ng mga teknikal na aspeto ang pelikula—musika, sinematograpiya,
disenyo. Pero tulad ng lagi naming binibigyang-diin, kung hungkag ito, hindi
makakasalba ang mga palamuting teknikal na ikukulapol dito.
Girlfriend
for hire ang tipo ng pelikula na simula pa lamang
ay alam mo na ang katapusan. Ang mas malala ay lagi na lang umiikot ang mga
kwento mula Wattpad sa mga mababaw at imposibleng relasyon. Ang mga babae ay humaling
na humaling sa mga lalaking abusado o makasarili at sa isang iglap, biglang
mababago ang ugali ng lalaki at sila ay mabubuhay nang “happily ever after”.
Sige, maaaring patok ang mga kwentong nakakakilig na ito sa mga kabataan pero
ano naman kaya ang mensahe ukol sa relasyon at pag-ibig ang naipapamahagi ng
mga ganitong pelikula? Kung bakit
nanatili si Nami bagamat hindi maganda ang pakikitungo sa kanya ni Bryle ay
isang malaking palaisipan, kungdi man katangahan. Sadya ba siyang mahina at walang paninindigan o ipagpapalit
ang dignidad para sa kaunting luho?
Kung may saysay man ang kuwentong ito, ito ay para ipakita sa kabataan
kung ano ang mga relasyong dapat iwasan.
