Cast: Coco Martin, Julia Montes, Cheri Gil, Gabby Concepcion, Zsa
Zsa Padilla ; Director: Emmanuel Quindo-Palo; Producer:
Star Cinema; Running Time: 112 minutes; Genre: Romance/ Drama; Location: Philippines
and Amsterdam
Technical Assessment: 2
Moral Assessment: 3
CINEMA Rating: for viewers 18 and above
Mabibighani ang baguhang pintor na si Patrick (Coco Martin) sa
unang pagkakita pa lamang nito kay Jillian (Julia Montes). Sa mga susunod na
araw ay ipipinta ni Patrick ang mukha ni Jillian sa mga pader na siya namang
mapapansin ng huli. Sa paraang ito muling magtatagpo ang kanilang landas at sa
marami pang pagkakataon ay tila sadya ngang pinagtatagpo sila. Sa pagtitiyaga
ni Patrick ay sasagutin din siya ni Jillian ngunit magbabago ang lahat pagka’t
malalaman ni Patrick na si Jillian ang nakasagasa sa kanyang ina (Zsa Zsa
Padilla). Dahil dito, magbabago ng pakikitungo si Patrick kay Jillian na siyang
ikapagtataka ng huli. Tuluyan silang magkakalayo at nang matauhan si Patrick sa
kanyang pagkakamali kay Jillian ay mahihirapan siyang lalo sapagkat ito ay
nagpakalayo-layo na sa Amsterdam. Magkita pa kaya silang muli at magkabalikan?
Ang A Moment in Time ay
isang pelikulang ginawa upang samantalahin ang init ng kasikatan ng dalawang bidang sila Coco
Martin at Julia Montes. Hindi man matatawaran ang husay ng dalawa sa pagganap,
pawang nasayang pa rin ang kanilang talino sa isang proyektong tila minadali at
hindi na gaanong napag-isipan. Nagkulang sa hagod ang pelikula pagdating sa
paghahain ng kapani-paniwalang sentro ng problema na siyang dapat paghuhugutan
ng emosyon ng dalawang bida. Resulta’y pawang pilit ang lahat ng pangyayari sa
pelikula at tila sa gitna ng pagkakagulo ng lahat, ang pinagtuunan na lang ng
pansin ay masiguro ang kanilang pagbabalikan. Hindi angkop sa mga karakter ang
kanilang mga naging reaksiyon sa mga pangyayari. Halimbawa ay ang kakulangan ng
pamilya ni Jillian ng sinseridad sa pagsisisi sa nangyaring trahedya sa pamilya
ni Patrick. Nang malaman nila ang katotohanan, tila baga, sila pa ang galit at
mayabang sa halip na punan ng kanilang pagkukulang. Ito at marami pang mga
pangyayari sa kuwento ang pawang di angkop sa tauhan at walang epekto sa
emosyon ng manonood dahil mali ang hagod ng mga eksena. Nasayang din ang
magagandang kuha ng pelikula sa mga interesanteng lugar tulad ng Amsterdam. Sa
kabuuan, ang A Moment in Time ay
isang pelikulang madaling mawawala sa alaala ng manonood dahil sa mababaw
nitong pagtrato sa dapat sana’y tunay na problemang hinarap ng dalawang bida.
Sa kabila ng marami nitong kakulangan, lumutang naman ang
kahalagahan ng pagpapatawad sa pelikula. Mas matimbang pa rin ang pagmamahal sa
galit sa bandang huli at tanging pagpapatawad ang magpapalaya sa anumang
tanikala ng galit na kinikimkim ng isang taong labis na nasaktan. Ipinakita rin
sa pelikula na hindi hadlang ang kaibahan ng estado sa buhay at ang pagmamahal
ay walang kinikilalang mayaman o mahirap. Nakakabahala nga lang kung paanong
tinakasan ng pamilya ni Jillian ang tunay nilang responsibilad sa nangyaring
aksidente sa ina ni Patrick. Pawang ipinakita na kayang takasan at pagtakpan ng
pera ang ganitong uri ng problema. Hindi ibinigay ang karampatang hustisya sa
isang taong napakahalaga sa buhay ng isang karakter. Ang hindi pagharap ng
pelikula sa tunay na problemang ito ay talaga namang nakababahala. Sa kabila
nito’y lumutang naman ang pagiging wagas ng damdamin ng mga pangunahing tauhan.
Gaano nga ba kalayo ang maaring marating ng tunay na pag-ibig at hanggang saan
ba ang kayang ibigay ng isang taong nagmamahal? Ipinakita sa A Moment in Time na walang imposible sa
taong nagmamahal—maging ang pagpapatawad sa matinding sakit na idinulot ng
taong minamahal. Ito nga marahil ang sukatan ng tunay na pag-ibig—laging
handang magpatawad at magparaya kung kinakailangan.
