DIRECTOR: JOEL LAMANGAN LEAD CAST: BARBIE
FORTEZA, KEN CHAN SCREENWRITER: RONA LEAN SALES PRODUCER:
LILY
MONTEVERDE, ROSELLE MONTERVERDE EDITOR:
CHARLIEBEBS GOHETIA MUSICAL
DIRECTOR: PAULO PROTACIO GENRE:
DRAMA/ROMANCE CINEMATOGRAPHER: SHERMAN
PHILIP SO DISTRIBUTOR:
REGAL ENTERTAINMENT RUNNING
TIME: 104 MINUTES
Technical
assessment: 2.5
Moral
assessment: 3
CINEMA
rating: V14
Sa klaseng
kinabibilangan ni Erika (Barbie Forteza), isang mass com student, ipinangako ng guro na sinumang makapagsusulat ng isang artikulong
mailalathala sa isang pambansang pahayagan ay sigurado nang makaka-Uno na
grado. Sinamantala ito ni Erika para ma-interview ang sikat na varsity swimmer na si Tristan (Ken Chan). Sa madaling salita, nalathala ang artikulong
isinulat niya pero ikinainis naman ni Tristan na naging publiko na ang para sa
kanya ay isang personal nang bahagi ng kanyang buhay. Dito magsisimula ang pagkakalapit ng dalawa,
ngunit matutuklasan ni Erika na habang siya ay in love na in love na kay
Tristan, ay nakikipaglaro lang pala ito sa kanya at sa katunayan ay may nobya
na. Dalawang beses madudurog ang puso ni
Erika sa mga kamay ni Tristan, susuong pa kaya siya sa ikatlong pagkakataon?
Tila
baga ginawa lang ang This Time I'll Be Sweeter para lamang maglungsad ng isa na namang bagong
tambalan pang-romcom. May istorya naman, at may intensyong magturo
ng leksiyon, pero patse-patse ang pagkakahabi ng kuwento—tagilid ang editing—tuloy naging artipisyal, at
hindi naging malalim o totoo ang hubog ng mga tauhan kaya’t bumaha man ang luha
ni Erika, halimbawa, ay hindi nito maantig ang habag ng manunood. Katawa-tawa din ang ilang detalya, tulad nang
si Tristan ay nasa airport—sa
karaniwang departure area lamang
naghihintay, pumipila tulad ng iba at hindi kilala ng mga ground stewardess—hindi ba’t bilang anak ng may-ari ng airline ay nasa First Class Lounge man lamang siya, at eestimahin ng mga airline personnel? In
fairness, mahusay ang pag-arte ni Chan bilang lasing na Tristan. Pero ang karamihan ng mga eksena, halos pa-kyut
lang, hindi kapani-paniwala, at parang nagmamanipula sa damdamin ng manunood.
Natubos
lamang ang This Time I'll Be Sweeter ng isang pangyayari sa katauhan ni Erika. Bagama’t masugid siyang reporter, nilagyan niya ng hanggahan ang pagiging agresibo sa
paghahanap ng kuwento. Tinalikuran niya
ang oportunistang editor pagkat
pinili niyang igalang ang pagdadalamhati ng nagluluksang pamilya ni Tristan. Ang pagsasa-alang-alang sa damdamin ng mga
naiwan ng mga yumao ay isang bagay na dapat itaguyod ng ating lipunan, lalu na
sa mga panahong ito kung kailan maraming nababalitang pinapaslang ng mga nakamotor
at di-kilalang salarin. Ipinakikita din
ng pelikula ang kahalagahan ng suporta ng pamilya at mga kaibigan sa taong may
pinagdadaanan.
