Tuesday, June 2, 2015

Para sa hopeless romantic


-->Direction: Andoy Ranay;  Cast: James Reid, Nadine Lustre, Julia Barretto and Inigo Pascual; Story: Marcelo Santos III; Screenplay: JM Gadingan; Editing: Nacelle Sayr; Cinematography: ; Production Design: ; Producer: .; Music: ; Location: PUP, Manila area; Genre: Teen Romance; Distributor: Star Cinema; Running Time:1:45;
Technical assessment : 3 stars
Moral assessment : 3 stars
CINEMA rating: V13
Hanggang ngayon ay masakit pa rin para kay Becca (Lustre) ang paghihiwalay nila ng kasintahang si Nikko (Reid), kaya naman kahit sa kanyang pagsusulat ng nobela para sa dyaryo ng paaralan ay hindi rin niya mabigyan ng masayang pagtatapos ang kanyang mga tauhang sina Maria (Barretto) at Ryan (Pascual) sa kanyang kwento. Pero muli siyang mabubuhayan ng loob nang magkaroon ng di sinasadyang ugnayan sa taong nakaupo rin sa kanyang upuan sa klase dahil sa pagpapalitan nila ng sulat at kwento.
May kaunting kiliti ang Para sa Hopeless Romantic, lalo sa mga kabataang sumusubaybay sa mga tampok na tambalan. Nakakatuwa rin ang disenyong pamproduksyon, lalo sa unang bahagi ng pelikula, kung saan kulay rosas ang kapaligiran ng ikinathang mundo nina Maria at Ryan, samantalang makatotohanan ang mga kulay sa mundo nina Becca at Nikko. Wala namang bigat na hiningi mula sa pagganap ng mga tauhan kaya't mapapatawad na ang matigas at tila mala-karton na pag-atake nina Reid at Pascual at ang malatang pagganap ni Barretto. Malinis ang pagkagawa sa pelikula at walang mapupuna sa ibang teknikal na aspeto nito. Kung sana ay sinikap pang pigain ang pagganap ng mga tauhan dahil walang “chemistry” ang kani-kanilang tambalan kaya’t ipinagpilitan ng musika at ng mga angulo ng kamera na palabasing nagkakagustuhan sila, para naman kiligin ang mga manunuod sa mga bahaging ito. Mas malaki naman ang kakulangan ng kwento sa pagtalakay sa pag-ibig dahil nauuwi lamang sa romansang pangkabataan ang mga karanasan nito. Sabagay, kaya nga “hopeless romantic” ang pamagat, dahil ipinapapalagay na hindi masyadong pag-iisipan ang panunuorin.
Bagamat wala namang malaswa o bastos sa Para sa Hopeless Romantic, ay may malaking usapin itong binubuksan—lalo na para sa mga magulang. Ang panahon ba ng kabataan ay panahon ng pagkakaroon ng relasyon? Handa nga ba ang isang mag-aaral na nasa high school na harapin ang kumplikasyon ng relasyon at pag-ibig? Tiyak, ang sagot ay hindi, kaya naman kadalasan ang isang kabataang nahiwalayan ng nobyo o nobya ay halos madurog na ang mundo at hirap nang harapin ang iba pang responsibilidad. Heto kasi ang idinidikta at ibinebenta ng media: "kabataan + romansa = takilya". Akala tuloy ng kabataan, pagtuntong nila ng "teen" ay may lisensya na silang magkarelasyon at duon na iikot ang kanilang mundo at buhay.
Ang tunay na pag-ibig ay mahirap matagpuan sa usbong ng kabataan dahil higit pa ito sa kilig, romansa at kulay rosas na kapaligiran. Ang tunay na pag-ibig ay sinusubok ng panahon, hinahasa ng mga tunay na suliranin ng buhay, pinapalalim at pinapagtibay ng karanasan at ng hamon ng pagbubuo ng sarili.  Kung manunuod ang mga kabataan, nas mabuting may kasamang nakatatanda na makapagpapaliwanag sa kanila ng konsepto ng pag-ibig.