Wednesday, October 30, 2013

Alagwa


Cast: Jericho Rosales, Bugoy Carino; Director: Ian Lorenos;  Screenplay: Ian Lorenos; Distributor: Star Cinema; Running Time: 88 minutes; Genre: Drama; Location: Manila/ Hongkong

Technical Assessment: 3.5
Moral Assessment: 3
CINEMA Rating:  PG 13 for viewers 13 years old and below with parental guidance

Makikita si Robert (Jericho Rosales) na palibot-libot sa mga kalsada ng Hong Kong na tila may hinahanap. Kasabay nito, makikita ang mga eksena ng kanyang nakalipas kapiling ang anak na si Brian (Bugoy Carino). Namatay ang asawa ni Robert sa panganganak kaya mag-isa niyang itinataguyod si Brian sa pag-aahente. Kahit nahihirapan, kita ang pagmamahalan ng mag-ama bagama’t madalas silang nagkakabangga at nagkakasagutan. Minsang matapos ang matinding pagtatalo ng dalawa, mamamasyal sila sa mall. Ngunit mawawaglit si Brian sa paningin ni Robert nang ito ay iwan niya sa palikuran ng mall. Nang ito ay kanyang binalikan, wala na si Brian.  Sa kanyang paghahanap, malalaman niyang maari itong kinidnap ng mga sindikatong dumudukot ng mga bata at dinadala sa Hongkong upang gawing pulubi. Gagawin lahat ni Robert, makita at mailigtas lamang ang anak. Magtagumpay kaya siya sa kanyang paghahanap?

Mariing napahatid ng Alagwa ang damdamin at sanga-sangang emosyon sa relasyon ng mag-ama habang tinatalakay din nito ang napakahalagang suliraning panlipunan na human trafficking.  Matagumpay ang pelikula sa pagtataguyod ng relasyong Robert at Brian. Pinaigting itong lalo ng kahusayan ng dalawang aktor sa pagganap. Hindi matatawaran ang galing ni Rosales sa pelikulang ito. Akmang-akma ang papel na Robert sa kanya. Maayos din ang kuha ng kamera pati na rin ang komposisyon ng bawat eksena. Natural na dumadaloy ang emosyon sa pelikula at hindi pilit. Pawang sumisilip sa mga eksena ng tunay na buhay ang mga manonood habang pinapanood kung paaanong nagkakagalit at nagbabati ang mag-amang Robert at Brian. Kung kaya’t ganun na rin lang ang pag-aalalang naramdaman ng manonood nang mawala si Brian. Isang matinding bagay ang nakataya kung kaya’t mauunawaan ng manonood kung bakit biglang naging mistulang sanggano si Robert na handang kalabanin kahit sino mahanap at mailigtas lamang ang nawawalang anak.

Hanngang saan nga ba ang kayang gawin at isakripisyo ng isang magulang para sa anak? Kahanga-hanga ang paglalahad ng pelikula kung gaano kawagas ang pagmamahal ng isang ama sa anak. Hindi tumigil si Robert hanggang sa huli makita lamang ang nawawalang anak. Katulad din ng walang tigil niyang pagta-trabaho maitaguyod lang at mapag-aral ang anak sa gitna ng kahirapan ng buhay. Paminsan-minsa’y kakikitaan ng kalupitan si Robert kay Brian ngunit mauunawan pa rin na bugso lamang ito ng damdamin sa hangaring mapabuti ang anak. Sinalamin  din ng pelikula ang tunay na mukha ng kahirapan sa bansa, na kung minsan ay hindi pantay-pantay ang pagkakataon para sa lahat kung kaya’t marami ang umaasa na lamang sa suwerte tulad ng pagkapanalo sa lotto (na siyang naging dahilan kung bakit nawaglit kay Robert si Brian). Ang pinakamasaklap pa nito’y kung paanong ang kahirapan ay nagiging dahilan ng paggawa ng mga tao ng karumal-dumal na krimen tulad ng human trafficking kung saan mga inosenteng bata ang nagiging biktima. Isang matinding pagtapik din ang pelikula sa gobyerno at awtoridad na gawin ang kanilang tungkulin upang masugpo ang mga ganitong uri ng krimen na madalas ay nangyayari sa mga lansangan. Ngunit higit sa lahat, isang matinding pagpapaalala ang Alagwa sa lahat ng manonood na maging mas mapagmatyag at hangga’t maaari’y tulungan ang gobyerno at lipunan na magbago. Na ang bawat isa ay may pananagutan sa kapwa at anumang masama o mabuting nangyayari sa bawat isa, lahat tayo ay may pananagutan. Dahil sa tema at ilang eksena ng karahasan, pinagpapalagay ng CINEMA na ang pelikula ay maaaring panoorin ng mga batang edad 13 gulang bababa,  bagama’t dapat silang samahan at gabayan ng mga magulang.