Wednesday, July 6, 2016

The Achy Breaky Hearts

DIRECTOR:  Antoinette Jadaone  LEAD CAST:  Jodi Sta. Maria, Ian Veneracion & Richard Yap  SCREENWRITER: Yoshke Dimen & Antoinette Jadaone PRODUCER: Malou Santos and  Charo Santos-Concio  GENRE: Romantic Comedy  DISTRIBUTOR: Star Cinema  LOCATION: Philippines  RUNNING TIME: 120 minutes 
Technical assessment: 3
Moral assessment: 2.5
MTRCB rating: PG
CINEMA rating:  V14
Sa edad na 30 ay nababahala na si Chinggay (Jodi Sta. Maria) sa estado niyang single. Sumisidhi ang pressure sa kanyang sarili kapag tinatanong siya kung kalian siya mag-aasawa. Ito ay dahil wala siyang boyfriend sa nakalipas na pitong taon kung kailan iginugol niya ang panahon sa pagsuporta sa pag-aaral ng nakababatang kapatid. Kaya nang makatapos ito ay hayagan siyang maghahangad na magkaroon ng kasintahan. Tila sinagot naman ang hangad niya dahil magkukrus muli ang landas nila ng dating kasintahang si Frank (Richard Yap) at makikipagbalikan ito sa kanya. Kasabay nito ay mababaling sa kanya ang atensyon ng isang  broken hearted na customer at matagal na niyang crush na si Ryan (Ian Veneracion). Malilito si Chiggay kung sino ang pipiliin niya.
Mula sa matagumpay na tambalan sa telebisyon, dinala ng malikot ng imahinasyon ng Star Cinema sa isang pelikulang romcom (romance-comedy) sina Sta. Maria, Yap at Veneracion.  Katulad ng inaasahan nakapaghatid ng kilig sinuman kina Yap at Veneracion ang kaeksena ni Sta. Maria.  Ito ay kahit hindi naman sa love triangle ng tatlo nakasentro ang kwento ngAchy Breaky Hearts kundi sa pagtahak ng pangunahing tauhan na si Chinggay sa buhay bilang isang single na tila midamadali ng ibang tao na mag-asawa.  Kaabang-abang ang wakas dahil hindi predictable ang plot katulad ng mga karaniwang romcom.  Pero medyo nakakainip ang pelikula na parang pinahabang salaysay.  Ang linyang “kailan ka mag-aasawa” na maraming beses tinanong kay Chinggay sa simula pa lang samantalang pinapaliwanag na ng voice over , gayundin ang mga matagal at paulit-ulit close up shot  ng iba’t ibang pag-eemote ni  Chinggay. Marahil nakadagdag din sa pagkabagot ng manonood ang monotonous  na boses ng voice over. Mabuti na lang magaling sa punch line  ang mga paulit-ulit din na eksena sa kainan ang magkakaibigan. Parang tinipid sa make-up at tila si Sta. Maria lang ang maayos na meron nito.  Maganda naman ang disenyo ng produksyon, pati ang mg inilapat na ilaw at tunog.  May kabuluhan at tumatak ang isinaliw na musika. Sa kabuuan ay parang madalian ang produksyon at di masyadong napag-isipan ang materyal para pagbidahan ng tatlo.
Sa panahon ngayon ang pagiging single at pananatiling malaya sa responsibilidad ng pag-aasawa ay isa nang option  at dumarami na din ang pumipili nito. Wala namang masama sa pagiging single at hindi dapat itong ikabahala ng sinumang nasa ganitong estado lalo na kung kapaki-pakinabang naman ang mga pinagkakaabalahan, katulad ng pagtulong sa pamilya at pagpapalago ng sarili at karera.  Ngunit mahalaga na tanggap mo at nauunawaan ang sitwasyon kung dumating man ang totoong pag-ibig.  Batid kaya ni Chinggay ang makakabuti sa kanya habang naghihintay pa siya kay Mr. Right?  Malamang ay hindi, kung ibabatay sa mga kabuluhang itinutro ng Simbahang Katoliko ang kanyang mga ikinikilos. Bago pa naman nagkaroon ng ganitong realization ang bida ng pelikula na si Chinggay ay hinayaan niyang mangibabaw ang kahinaan sa kanyang sarili—katulad ng pakikipagsiping sa dalawang lalaki kahit na wala pang linaw kung ano ang mga namamagitan sa kanila. Sinadya rin niya na pahirapan ang dating kasintahang si Frank nang nakikipagbalikan ito sa kanya upang makaganti sa pang-iiwan sa kanya nito noong nakaraan. Binigyang-katwiran niya at hinangaan pa ang kapatid na nabuntis ng boyfriend na walang trabaho at sumuong sa pag-aasawa nang hindi handa.  Bilang isang propesyonal at manager ng isang business, kahit na crush mo pa, hindi akma na samahan mo hanggang sa kwarto ng motel ang isang customer na gusto mong suportahan, o hayaang isubo ang daliri para matanggal ang singsing gayung bilang nagtatrabaho sa jewelry store ay alam mo dapat ang mga paraan kung paano ito matatanggal.  Hindi rin kailangan sumisigaw kapag tinatawag ang waiter lalo na sa isang fine dining restaurant.  Maaaring akalain ng manonood na katanggap-tanggap na ang mga gawing ito, at tularan pa ng mga kabataan.  Maaaring walang eksenang sex ang pelikula pero para sa mature viewers ang kabuuang tema at presentasyon nito ng pelikula.