Wednesday, October 28, 2015

The prenup


DIRECTOR: Jun Lana  LEAD CAST: Jennylyn Mercado, Sam Milby, Gardo Versoza, Dominic Ochoa, Jaclyn Jose, Tirso Cruz III  SCREENWRITER: Jun Lana   GENRE: Romantic Comedy  CINEMATOGRAPHER: Carlo Mendoza DISTRIBUTOR: Regal Entertainment LOCATION: Philippines; New York USA  RUNNING TIME: 1  hour 58 minutes
Technical assessment:  2.5
Moral assessment:  2.5
CINEMA rating:  V14
            Unang magkikita nang ilang saglit si Wendy (Jennylyn Mercado) at si Sean (Sam Milby) nang magbanggaan ang kanilang mga sasakyan sa kalye.  Magtatagpo silang muli sa eroplano, bilang magkatabi ng upuan sa business class, at mag-iinisan sila sa buong haba ng biyahe mula Maynila hanggang New York, kung saan inaasahan ni Wendy na makapiling ang kanyang tunay na ama.  Magkikita ang mag-ama pero hindi matutuloy ang pagpisan ni Wendy sa ama pagkat tutuol dito ang babaeng kinakasama nito.  Habang namomroblema kung saan tutuloy si Wendy, susulpot muli sa eksena si Sean, na tila hindi umalis habang naghihintay sa ama si Wendy.  Nagmamagandang-loob, kukupkupin ni Sean si Wendy sa kanyang apartment sa New York.  Sa madaling salita, magkakaigihan ang dalawa hanggang sa magkasundong magpakasal.  Dito magsisimula ang gulo sa matamis nilang pakikipag-ugnayan.
            Bagama’t may mga parteng nakakaaliw sa mga eksena ng The prenup, gaya ng mga kuha sa New York at ang pagkakagayak ng bahay/tindahan ng pamilya ni Wendy, marami din namang mga aspeto na hindi pulido ang pagkakagawa—tulad ng tunog (na minsa’y nakabibingi), ang kawalan ng orihinal na musical score, ang mababaw na characterization, ang editing na tila may bungi, at ang dialogue kung saan nangingibabaw ang bastusan sa kapwa.  Sayang ang kahanga-hangang talino sa pagganap ni Mercado na ipinakita niya sa pelikulang Rosario; sa The prenup, kahit “carry” niya ang rom/com, hindi nito hinamon ang husay ng artista.  Ang mismong istorya ng The prenup, tulad ng mabilisang pag-iibigan nila Wendy at Sean, ay mukhang minadali din, tinuhog ang mga pira-pirasong kuwelang eksena at kinoronahan ng isang happy ending—sa tingin kaya ng mga producers ay sapat na ito para katalinuhan ng mga manunuod?
            Gasgas na ang tema ng The Prenup—guwapong binata, magandang dalaga, magkakatagpo, magkakaibigan, pero tututol ang kani-kaniyang mga pamilya.  Ang isa kasi’y ubod ng yaman at ang isa nama’y … hindi nila kauri, ika nga.  Para hindi siguro malaglag ang predictable na kuwento, tutukuran ito ng bagong elemento: parehong lalaki ang mga adoptive parents ng ulilang si Wendy.  Hindi mapigilan ng CINEMA na magtaka kung walang hidden agenda ang The prenup—bukod sa mga binabaeng nag-ampon kay Wendy, ay may bakla at tomboy din sa dalawang pamilyang sangkot.  Ang pagtatapos ng pelikula ay “hati”, ika nga: bagama’t tumpak, ito’y artipisyal; hindi ganitong kasimple ang resolusyon ng ganoong mga situasyon sa tunay na buhay.  Buti pa ang mga fairy tales, pinahihirapan muna ang mga karakter bago makamtan ang matamis na happily-ever-after.
            Hindi nababagay sa mga murang isipan ang pelikulang ito gawa ng ipinakikita nitong kagaspangan ng asal at ang bunga nitong kabastusan sa pananalita.  Maaaring magdulot din ng kalituhan ang pelikula sa mga bata na dapat ay pinalalaki sa wastong pagpapahalaga sa pagkakaiba ng kasarian ng babae at lalaki.