Monday, August 20, 2012

Just one summer


Cast:  Elmo Magalona, Julie Anne San Jose, Joel Torre, Alice Dixon, Cherry Pie Picache, Gloria Romero, Buboy Garovillo  Director: Mac Alejandre  Screenwriters:  Oman Sales, Emman Dela Cruz, Kei Fausto  Producer: GMA Films  Location: Philippines  Genre: Drama  Running Time: 105 minutes

Technical Assessment: 3.5
Moral Assessment:  2.5

CINEMA Rating:  For mature viewers age 14 and above

Lumaki si Nyel (Elmo Magalona) na puno ng hinanakit at galit sa ama na si Dan (Joel Torre) dahil mas pinili nito na manirahan at asikasuhin ang kabuhayan sa probinsya  kaysa makapiling sila ng ina na si Irene (Alice). Subalit ng kinailangan niya ang pirma ng pagpayag ng ama para makapag-aral sya sa ibang bansa ay napilitan si Nyel na puntahan ang ama sa probinsya kung saan matutuklasan niya na may iba na itong kinakasama. Magiliw at maasikaso naman kay Nyel ang bagong kasama ng ama na si Julie (Cherry Pie Picache) subalit katulad ng inaasahan ay na kay Irene na tunay nyang ina ang simpatiya ni Nyel kaya kahit papaano ay damay si Julie sa malamig at masungit na pakikitungo ni ni Nyel sa ama. Samantala, manggagawa sa gatasan ni Dan ang pamilya ni Beto (Julie Anne San Jose).  Sa takot na madismaya ang amang si Berting (Buboy Garovillo) dahil di siya pinalad na maging iskolar ay lumapit si Beto kay Dan upang umutang ng pang matrikula at nakiusap na pagtrabuhan sa gatasan ang pambayad sa halaga ng mauutang nya. Madali naming pumayag si Dan sa kondisyon na ang trabahong ibinigay sa kanya ay subaybayan at kaibiganin ang nagbabakasyong anak na si Nyel upang kahit papaano ay magustuhan nito ang buhay sa bukid.  Hindi naging madali kay Beto ang trabaho dahil nga isang lalaki na puno ng galit at isyu sa pamilya si Nyel ay nakatikim din sya ng kasungitan nito pero dahil trabaho ay pinagtiisan nya ang lahat. Hanggang saan hahantong ang isyu sa pamilya ni Nyel at ang sitwasyon nina Nyel at Beto?

May mga sablay ang daloy ng kuwento ng pelikulang “Just One Summer”. Hindi malinaw kung bakit tila wala man lamang naging komunikasyon ang mag-anak sa isa’t isa sa mahabang panahon ng paghihiwalay, at kung bakit tila nagulat pa na may iba ng kasama ang ama. Hindi rin nakitaan ng lalim ang nabuong espesyal na pagtitinginan ng mga karakter nina Beto at Nyel at di masyadong nakapaghatid ng kilig ang tambalan ng dalawa. Mas lumutang ang kwentong pamilya sa pelikula kaysa kwento ng pag-ibig ng dalawang kabataan na siyang sinasaad sa promosyon ng pelikula. Kung  love story ang aabangan ng isang manonood ay mabibigo dito.  Nakasentro sa karakter ni Nyel ang kwento bilang anak. Nakatulong ang suporta ng mga batikang actor sa pelikula upang makapagpahayag ng emosyon sa mga eksena at may potensyal naman ang mga baguhan lalo na si Magalona. Maganda ang kuha ng camera lalo na ang mga eksena ng tanawin sa bukid at sa gatasan. Nakapaglarawan ang pelikula ng kaalaman tungkol sa proseso ng pagpipiga ng gatas mula sa dibdib ng mga gatasang baka. Maganda ang disenyo ng produksyon kahit na sa loob at labas ng mga bahay ng mayaman at mahirap kaya madaling nakapaglaro ang mga kuha ng camera. Akma lamang ang ilaw at inilapat na tunog sa mga eksena bagamat halos di nakarinig ng ingay mula sa mga baka. Maingat ang pagkakalapat ng musika lalo na ang theme song kahit ilang beses na ginamit sa mga lumang pelikula. Sa kabuuan ay maayos ang teknikal na aspeto ng palabas.

Napakalapit sa puso ng mga Filipino ang tema ng pamilya lalo na kung nagpapakita ng pagmamahalan, pagkakaisa at pagkakasundo. Taliwas ito sa ipinakita sa mas mahabang parte ng pelikula. Nakakabahala ang kawalan-respeto ng anak sa ama at sa marangal na trabaho sa bukid. At hindi katanggap-tanggap na maging pisikal ang ang anak sa pananakit sa magulang katulad ng pinakita sa pelikula. Subalit mas nakababahala ang pagiging komportable ng ama sa bukid sa piling ng ibang babae sa kabila ng pagkakaroon ng lehitimong asawa at anak na dapat ay naging pangunahing responsibilidad niya bilang padre de pamilya.  Malinaw na hindi nagbigayan at sa halip ay pinairal ang pride kaya tuluyang nawasak ang pamilya na syang labis na nakaapekto sa pagkatao ng kanilang anak. Samantalang imahe ng matatag, composed at mahinahon na mga babae sa gitna ng sigalot ng pamilya ang ipinakita sa pelikula. Bagamat kapwa nabigla ay wala ang madalas na eksena ng sigawan, sumbatan at sabutan sa pagitan ng legal na asawa at kabit. Subalit kahit gaano kahinahon o kabuti ang pagdadala ng isang babae sa sitwasyon niya bilang kabit ay imoral na gawain pa rin maituturing ang pagpatol sa isang may-asawa hanggat hindi pa legal na hiwalay.

Napakahalaga ng papel ng magulang sa paggabay sa anak lalo na sa pakikipagrelasyon at paghahanda sa hinaharap. Ang pag-ibig sa murang gulang ay dapat bukas sa paggabay ng magulang para maging maayos at magsilbing inspirasyon sa pagtupad ng mga pangarap. 

Maselan ang mga ipakitang paksa ng wasak na pamilya, pakikiapid at epekto ng mga ito sa pag-uugali ng anak kaya kailangan na may taglay na sapat na kaisipan at pang-unawa ang manonood ng pelikulang ito.